Rio Olimpiadasında olimpiya məşəlini alovlandıran sabiq atlet Vanderley Limanın karyerasında çox dramatik bir hadisə yaşanıb. Sportfm.az saytının verdiyi məlumata görə, 2004-cü il Afinada keçirilən Yay Olimpiya oyunlarında marafon qaçışında favorit qismində göstərilən braziliyalı idmançının başına gələn qəza yaddaşlardan silinməyib. Yarış başlayan kimi liderliyi ələ alan Lima finiş xəttinə az qalmış seyrcilərdən birinin hücumuna məruz qalıb. Yarışı izləyən bir tamaşaçı qoruyucu səddi aşaraq, braziliyalı atleti distansiyadan çıxarmağa müvəffəq olub. Şoka düşən Limanın özünü ələ almasına baxmayaraq, yarış onun üçün fiaskoya çevrilib. 35 yaşı olan idmançı qaçışı ancaq 3-cü sırada bitirə bilib. Sonradan həmin tamaşaçının irlandiyalı bir rahib olduğu ortaya çıxıb. Rio-2016-nın təşkilat komitəsi olimpiadada qızıl qazanmasa belə, olimpiya hərəkatının ruhunu tərənnüm etdirən bu atleti unutmayaraq məşəli məhz onun alovlandırmasını istəyib.