Paytaxtımızda təlim-məşq toplanışında olan çimərlik futbolu üzrə Litva millisinin rəhbər və məşqçi heyəti Dünya Futvole Federasiyasının prezidenti Vüsal Xəlilovla görüşüb.
Sportfm.az xəbər verir ki, Azərbaycan Futnet Federasiyasında gerçəkləşən görüşdə yerli qurumun rəsmiləri Gülağa Cabbarov və uzun illər çimərlik futbolu üzrə FİFA referisi olan Əfqan Həmzəyev də iştirak edib.
Litva Çimərlik futbolu və Futzal Federasiyasının rəhbəri Vidmantas Butkeviçyus ilə təkbətək görüşdə Azərbaycan Futnet Federasiyasının da prezidenti olan Vüsal Xəlilov futtennis və futvole idman növlərinin ikitərəfli inkişaf perspektivləri, qarşılıqlı əlaqələrin qurulması və beynəlxalq sahədə əməkdaşlıq haqqında müzakirələr aparıblar.
Son illər Azərbaycanda futvole və futnet sahəsində görülən işləri yüksək qiymətləndirən Litva nümayəndə heyəti, beynəlxalq federasiyanın tərkibinə qatılmaq üçün əməli addımlar atmağa hazır olduqlarını vurğulayıblar.
Qeyd edək ki, çimərlik futbolu üzrə Litva millisi Bakıda yığmamızla iki yoldaşlıq matçında qüvvəsini sınayıb.