Avro-2024-ün seçmə mərhələsində iyunun 19-u keçiriləcək Türkiyə - Uels matçının oynanılacağı Samsun 19 May Stadionunun son durumu sosial şəbəkələrdə müzakirələrə səbəb olub.

Sportfm.az xəbər verir ki, Türkiyə Futbol Federasiyasının görüşün məkanı olaraq təyin etdiyi stadionun bəzi yerlərində çatlar və döşəmədəki boşluqlar azarkeşlərin narazılığı ilə qarşılanıb.

Sosial mediada stadionun sürətlə yayılan görüntülərindən sonra Samsun Gənclər və İdman Baş İdarəsi bununla bağlı hesabat hazırlayıb. Hesabat Gənclər və İdman Nazirliyinə təqdim edildikdən sonra araşdırma başlanıb.

2017-ci ilin avqustunda “Beşiktaş” – “Konyaspor” arasında oynanılan Superkubok matçı ilə açılışı olan stadionun podratçı firmasının mütəxəssis qrupları və inşaat mühəndisləri tərəfindən aparılacaq araşdırmadan sonra ictimaiyyətə məlumat veriləcək.