Artıq futboltennis idman növü ilə məşğul olanlar ilk məşqə çıxıb. "Marafon” idman klubunun məşq meydançasında toplaşanlar arasında həvəslə çalışan gənc qız saytımıza müsahibəsində bir çox məqamlara aydınlıq gətirib. Nərgiz Hacıyeva ilə söhbətdə məlum olub ki, futboltennisə olan marağı onu zala gətirib:

"Bu idman növünü daim izləyirdim. İnternetdə olan videolara baxırdım. Etiraf edim ki, çox xoşuma gəlir. Bizdə futnet üzrə assosiasiyanın yaranmasından sonra bu idman növü ilə məşğul olmaq imkanı əldə etmiş oldum. Çox maraqlı və əyləncəlidir. Bütün gənclərə tövsiyə edirəm. Ancaq onu da deməliyəm ki, bu digər idman növlərindən tamamilə fərqlənir. Mən özüm 13 yaşından futbolla məşğul olmağa başlamışam. İlk məşqçim Boris Tibilov olub. Ancaq futboltennisdə təkcə futbol vərdişləri bəs etmir”.