Azərbaycan Milli Antidopinq Agentliyinin (AMADA) direktoru Şəfəq Hüseynli Ümumdünya Antidopinq Agentliyinin (ÜADA) Kanadanın Monreal şəhərində keçirilən Təsisçilər Şurasının və İcraiyyə Komitəsinin iclaslarında iştirak edib.

Sportfm.az xəbər verir ki, səfər zamanı Ş.Hüseynli ÜADA-nın mənzil-qərargahında olub və bir sıra işgüzar görüşlər keçirib.

ÜADA-nın təhsil və maarifləndirmə üzrə şöbəsinin rəhbəri Toni Kanningem ilə görüşdə AMADA-nın Azərbaycanda dopinqlə mübarizə ilə bağlı keçirdiyi maarifləndirmə tədbirləri və antidopinq sahəsində beynəlxalq layihələrdə iştirakı perspektivləri müzakirə edilib.

Bundan əlavə, beynəlxalq federasiyalarla əlaqələr departamentinin rəhbəri Qabriel Zangenfaynd ilə AMADA-nın beynəlxalq idman federasiyaları ilə qarşılıqlı əməkdaşlığı genişləndirmək planları haqqında fikir mübadiləsi aparılıb.

ÜADA-nın direktor müavini, milli və regional antidopinq agentlikləri ilə əlaqələr üzrə məsul şəxs Tom Mey ilə söhbət zamanı isə Azərbaycanda dopinqlə mübarizənin strateji inkişaf istiqamətləri, həmçinin qarşılıqlı ikitərəfli və çoxtərəfli münasibətlərin genişləndirilməsi perspektivləri müzakirə edilib.

Antidopinq fəaliyyəti sahəsində beynəlxalq əməkdaşlıqda mühüm platformalardan sayılan ÜADA-nın Təsisçilər Şurasının və İcraiyyə Komitəsinin növbəti iclasları bu ilin noyabrında AMADA-nın təşkilatçılığı ilə Bakıda keçiriləcək.

Oxşar xəbərlər

Şəfəq Hüseynli Portuqaliyanın AŞ Antidopinq Konvensiyasına uyğunluğu monitorinqində iştirak etdi

AMADA AŞ Antidopinq Konvensiyasına uyğunluğunu yoxladı

AMADA beynəlxalq layihəyə başladı - Gender bərabərliyi

AMADA-nın rəhbərinə yeni vəzifə verildi

Gənclər və İdman naziri Strasburqda işgüzar səfərdədir - FOTO