Mövsümün bitməsi ilə Azərbaycan Premyer Liqasının son çempionu "Qarabağ" transfer çalışmalarına start verib. 

Sportfm.az xəbər verir ki, klub rəhbərliyinin bir neçə mövqeni gücləndirmək üçün futbolçu axtarışına çıxdığı məlumdur. Bununla yanaşı, yavaş-yavaş klubu tərk edən futbolçuların adlarına da aydınlıq gəlir. Həmin futbolçulardan biri, uzun illərdir Ağdam komandasının şərəfini qoruyan İlqar Qurbanovdur. Təcrübəli müdafiəçi gedişi ilə bağlı saytımıza açıqlamasında bunları dedi:"Klubla olan müqaviləm sona yetdi. Komanda rəhbərliyi mənə yeni müqavilə təklif etmədi. Uzun illərdir çıxış etdiyim, formasını qürurla daşıdığım "Qarabağ"ı tərk etdim. Hazırda ailəmlə birlikdə istirahət edirəm. Hələ ki, heç bir klubla danışıqlar aparmıram. Təklifləri istirahət bitdikdən sonra götür-qoy edəcəm. Karyeramı Azərbaycanda və ya ölkə xaricində davam etdirəcəyimə qərar verməmişəm". 

Qeyd edək ki, karyerasına hücumçu kimi başlayan İlqar Qurbanov 2011-ci ildən "Qarabağ"ın şərəfini qoruyurdu.