Türkiyənin zəlzələdən ən çox zərər çəkmiş bölgələrindən biri olan Hatayı təmsil edən "Hatayspor"un ev oyunlarını harada keçirəcəyi ilə bağlı müzakirələr aparılıb.

Sportfm.az xəbər verir ki, Türkiyə Futbol Federasiyası "Hatayspor" klubunun İstanbulun Riva qəsəbəsindəki bazda məşq keçməsini uyğun görüb.  Artıq komandanın baş məşqçisi Volkan Demirel və futbolçular İstanbula gediblər. 

Yerli federasiya "Yeni Malatyaspor" və zəlzələdən zərər çəkən digər aşağı liqa təmsilçilərinin də ev oyunlarını keçirəcəyi stadionu müəyyənləşdirmək üçün işlər aparır.

Qeyd edək ki, 10, 11, 12 və 13 fevrala nəzərdə tutulan Superliqa oyunları 1,2, 3-cü liqaların matçları 17, 18, 19 və 20 fevralda oynanılacaq. "Hatayspor" Superliqada 23 xalla 14-cü pillədə qərarlaşıb.