- "Novotel Cup 2017”də bizim yığmamızda iştirak edib. Lüksemburqda baş tutan bu yarışa xüsusi olaraq hazırlaşmışdınız?

- Bir ay əvvəldən turnirə hazırlığa başladıq. Tam olmasa belə, müəyyən mənada ora hazır yollandıq. 

- Turnirdə iştirak etməkdə əsas məqsəd nə idi? 

- Bu turnirdə əsas məqsədimiz digər yığmalarla oynayıb, təcrübə qazanmaq idi. Təbii ki, yarışın qalibi olmaq üçündə mübarizə aparırdıq. 

- Ancaq sonda yığmamız 3-cü sırada yer ala bildi...

- Bunun müəyyən səbəbləri var. İlk matçda İslandiya yığması ilə üz-üzə gəldik. Onları 3:1 hesabı ilə yendik. 2-ci matçımız gərgin keçdi, Lüksemburq yığması ilə demək olar ki, eyni səviyyədəyik. Ancaq oyun təcrübəmizin azlığı yekunda öz sözünü dedi. Və biz 3:2 hesabı ilə meydanı məğlub tərk etdik. Almaniyanın gənclər yığması(U-21) ilə eyni nəticə qeydə alındı. Onlara yalnız tay-brekdə məğlub olduq.  

- Yığmamızın çıxışını necə dəyərləndirərdin?

- Düşünürəm ki, pis oynamadıq. Sadəcə çatışmayan cəhətlər var. Onların üzərində işləmək lazımdır. Əsasən oyun təcrübəsi baxımından əziyyət çəkirik. Görüşlər zamanı yol verilən səhvlərin böyük əksəriyyəti təcrübənin olmamasından qaynaqlanırdı. 

- Oyun təcrübəsi baxımından əziyyət çəkən yığma üzvləri il ərzində orta hesabla neçə matçda qüvvəsini sınamalıdır?

- Digər yığmalar il ərzində 30-40 oyun keçirir. Bizim yığmamızda isə bu rəqəm çox azdır. Yəqin ki, federasiya rəhbərliyi bütün bunları nəzərə alacaq. Əlavə turnirlərə və təlim-məşq toplanışlarına yollansaq, bu çatışmamazlığı aradan qaldıracağımıza inanıram.