Azərbaycanın su polosu üzrə U-19 yığması bu günlərdə Hollandiyada keçirilən gənclər arasında Avropa çempionatında Gürcüstan və Xorvatiya yığmalarına böyük hesabla məğlub olub. Sportfm.az xəbər verir ki, Gürcüstanla keçirilən qarşılaşmanın ən məhsuldar oyunçusu hesabında 6 qol ilə Nika Şuşiaşvili olub. Rəqibin Andria Bitadze və Qeorgi Maqrakvelidze adlı vaterpolçuları isə hərəyə 5 dəfə fərqləniblər.

Azərbaycan komandası qrupda son görüşünü Xorvatiya millisinə qarşı keçirib. Bu görüş də yığmamızın böyük hesablı məğlubiyyəti ilə başa çatıb - 1:15. Qrupun ilk oyununda isə komandamız Rusiyaya yenilmişdi. Bununla da Azəbaycanın su polosu yığması 0 xal ilə qrupda sonuncu yeri tutub. Turnirdə 4 qrupa bölünən 16 komanda iştirak edir. Hər qrupun qalibi 1/4 finala birbaşa vəsiqə qazanıb. Digər komandalar "play-off" oyunlarında iştirak edirlər və bu görüşlərin yekunu üzrə digər 1/4 finalçılar müəyyən edilir.

Su polosu üzrə Avropa çempionatı sentyabrın 18-də başa çatacaq.