Almaniyanın Köln şəhərində həndbol üzrə kişilər arasında Çempionlar Liqasının final matçı keçirilib. 

Sportfm.az xəbər verir ki, həlledici qarşılaşmada iki fransız klubu - "Monpelye" və "Nant" üz-üzə gəlib. Oyun birincilərin qalibiyyəti ilə bitib - 32:27. Turnirdə üçünücü yer uğrunda görüşdə isə "Pari Sen-Jermen" və Makedoniya "Vardar"ı ilə qarşılaşıb. Paris təmsilçisi rəqibini 1 top fərqiylə məğlub edib - 29:28.

Qeyd edək ki, bu "Monpelye"nin qazandığı ikinci belə trofeydir. Bundan əvvəl komanda 2003-cü ildə Çempionlar Liqasının kubokunu başı üzərinə qaldırıb. Avropanın ən titullu klubu isə "Barselona"dır. İspanlar 9 dəfə ən güclü olub.