"Çətin qrupa düşdük. Altı komandalı qrupda oynamağı istərdik. Amma sürpriz edə bilərik".

Sportfm.az əbər verir ki, bunu açıqlamasında Azərbaycan milli komandasının məşqçisi Arif Əsədov 2024-cü il Avropa çempionatının seçmə mərhələsinin püşkünün nəticəsini dəyərləndirərkən deyib.

52 yaşlı mütəxəssis bildirib ki, Belçika, Avstriya və İsveç top yığmalar sırasındadır: "Xüsusilə belçikalıları qeyd edərdim. Bu yığma son illər yüksəlişdədir. Futbolçuları dünyanın ən yaxşı klublarında çıxış edir. Hamısı üzdə olan oyunçulardır. Bu baxımdan favorit Belçikadır. İsveç və Avstriya bərabərsəviyyəli komandalardır. Onların arasında 2-3-cü yerlər uğrunda mübarizə gedəcək".

Canni De Byazinin köməkçisi milli komandanın şanslarına da toxunub: "Birinci yeri tutacağımızı söyləmək real olmaz. Yığmanın qarşısına hər zamankı kimi yüksək məqsədlər qoyulacaq. Bacardıqca çox xal toplamaq, yaxşı oyun nümayiş etdirmək lazımdır. Rəqibləri analiz etdikdən sonra daha dəqiq fikir bildirmək olar".

Əsədovun sözlərinə görə, qrupda bütün komandalardan xal almaq mümkündür: "Millətlər Liqasındakı son oyunlar da göstərdi ki, millimiz artıq inkişaf edir. Qələbə ruhunu qarşıdakı seçmə mərhələdə də davam etdirməliyik".

Qeyd edək ki, Azərbaycan millisi seçmə mərhələdə Belçika, Avstriya, İsveç və Estoniya ilə birlikdə F qrupunda mübarizə aparacaq. (Report)

Oxşar xəbərlər

De Byazi püşkü dəyərləndirdi - "Asan qrup deyil"

"Qrupda öz sözümüzü deyə bilərik" - Canni De Byazi

"Rəqibləri analiz etmək lazımdır" - Azərbaycan millisinin baş məşqçisi

Obradoviç püşkü dəyərləndirdi - "Qrupumuzdakı komandaların heç birindən qorxmuruq"

Yığmamız İngiltərə ilə eyni qrupda