Əzabları bitməyən, dərdli Azərbaycan futbolu...Hər gün daha yaxşı olacağına ümid etdiyimiz, ancaq daha pis olan, Azərbaycan futbolu. Bəli, təəssüflər olsun ki, uzun illərdi 8 komandalı Premyer Liqanın olmasına üzülürdük, nəhayət, növbəti mövsümdən etibarən futbol elitamızda 10 komanda olacağına sevinmək istəyirdik ki, sevincimiz qursağımızda qaldı. Bu dəfə məlum oldu, Birinci Divizionla bağlı əndrabadi qərarlar verən AFFA-nın günahı ucbatından "bataqlığa" çevrilən turnir heç kimə lazım deyil. Elə elita klublarına da. Əgər belə olmasaydı, əsas komandasının güclənməsi üçün böyük pullar xərcləyən "Sabah" əvəzedici komandasını dağıtmazdı.

Son mövsümdə AFFA-nın keçirdiyi uşaq liqalarında klubun akademiyası 5 qızıl, 2 bürünc medal qazansa da, rəhbərlik əvəzedici komandanı saxlamağı lazım bilməyib, yəni artıq xərc hesab edib. Əvəzedici heyətdə çıxış edən 25 nəfərə yaxın gənc futbolçunun(onların arasında aşağı yaş qrupları üzrə milli komandalarımızın şərəfini qoruyan 10-na yaxın futbolçu var - A.Ə)taleyi isə heç kimə maraqlı deyil. Onlar sözün həqiqi mənasında küncdə qaldı. 

Hazırda eyni hadisələr "Qəbələ" klubundada yaşanır. Bu gedişlə onlar da əvəzedici heyətdən imtina edəcəklər. Ordada 25-ə yaxın futbolçu gənc bədbəxt olacaq. Üstəlik, ipdən asılı vəziyyətdə olan "Şamaxı"nın da gənc komandasını buraxacağı yazılır. Yəni 100-ə yaxın potensiallı gənc oyunçu küçələrdə qalacaq, futbolu atacaq. Bu tragediyanın miqyasını düşünün. Futbolçu çatışmayan ölkədə gənc futbolçuları futbolsuz qoyurlar. Yəqin "inkişaf" dedikləri budur. Sadəcə bizim xəbərimiz yoxdur. 

Araz Əhmədov