Son illər isə Bakıda və bölgələrimizdə olan-qalan təbii ot örtüklü meydançalardan kütləvi şəkildə imtina edilərək, süni qazona üstünlük verilməyə başlandı. İş o yerə gəlib çatdı ki, təbii örtüyü olan bir çox stadionun qazonu dəyişdirilərək sintetik örtüklə əvəz edildi. Ancaq son zamanlar Premyer Liqanın oyunlarında bir çox futbolçuların zədələnməsi, baş məşqçilərin sintetik örtükdən şikayətlənməsi, bəzi oyunçuların isə bu səbəbə görə, ümumiyyətlə bizim çempionatda oynamaq istəməməsi, problemi yenidən gündəmə gətirdi. Məsələ ilə bağlı 1972-ci ildən bu sahədə çalışan mütəxəssis, ADBTİA-nın futbol şöbəsinin müəllimi, ölkəmizdə bir çox təbii örtüklü meydançaların salınmasında və onlara qulluq edilməsində yaxından iştirak edən Sulduz Salmanova müraciət etdik. Sizləri mütəxəssisin fikirləri ilə tanış edirik.

(Müsahibənin 2-ci hissəsi)