Azərbaycan Futzal Federasiyası Hollandiyada keçirilən Avropa çempionatının startından öncə minimum hədəfin ¼ finala vəsiqə qazanmaq olduğunu açıqlamışdı. Qrupumuzdakı rəqiblərimiz də dişimizə görə olan yığmalar idi. Favorit İspaniyanı nəzərə almasa ilk dəfə 16 komanda ilə təşkil olunan qitə çempionatının debutantları Gürcüstan ilə Bosniya və Hersoqovina komandalarından 3 xal almaq real görünürdü... Lakin elə ilk matçda qonşularımız Alesio və yetirmələrinin arzusunu gözündə qoydu. Gürcülər son illərdə tutduqları yolun doğru olduğunu və artıq futzalda da milli komanda səviyyəsində ölkəmizi geridə qoyduğunu göstərdi. Kimsə düşünə bilər ki, heyətlərində milliləşdirilmiş braziliyalılar oynayır. Lakin bir o qədər sambaçı bizim də millimizin şərəfini qoruyur. Özü də bizdən fərqli onlarda qələbənin əsas memarı bizdəki kimi əcnəbi deyil yerli çalışdırıcı Aftandil Asatianidir.

Həqiqətən bugün bir çox yığmalarda əcnəbi oyunçular milliləşdirilərək çıxış edir. Bu praktikadan Rusiya, İtaliya, Qazaxıstan kimi iddalı ölkələr də yararlanır. Elə yığmamızın da ara-sıra qazandığı uğurlarda əsas pay sahibi milliləşdirilən sambaçılar olub. Misal üçün AÇ-2010 və DÇ-2016-dakı naliyyətləri xatırlamağımız kifayətdir. Yenicə start götürəm AÇ-dəki millilərin sükanı arxasında olanlara baxsaq görərik ki, gürcülər də olduğu kimi əksər yığmaları yerli məşqçilər çalışdırır. O zaman niyə biz də bu təcrübədən yararlanmayaq? Məgər bizdə millinin sükanı arxasına keçə biləcək mütəxəssis yoxdur? Düşünürəm ki, var həm də gənc mütəxəssislər. Ağıla ilk gələn isim isə Elnur Qəmbərovdur. Həmin Qəmbərov ki, məşqçilik etdiyi iki il ərzində “Xəzər Adaları”nı birinci liqanın, ardınca isə yüksək liqanın qalibi edərək “Araz”ın 9 illik hegomoniyasına son qoymağı bacarmışdı. Digərlərindən fərqli Qəmbərovun yaxşı seleksiya bacarığı da var. Ölkə çempionu olduğu mövsümdə komandasına cəlb etdiyi Leo Oliviyera, Araçe, Fineo (həmin Fineo ki, Azərbaycana gəlişindən az müddət sonra milliyə cəlb olundu) səviyyələri ilə digər legionerlərdən müsbət mənada seçilirdilər. Ümumiyyətlə Elnur maksimalistdir. Qarşısına həmişə yüksək hədəflər qoyur və rəhbərlikdən bunun üçün lazımi şəraitin yaradılmasını tələb etmək xarakterinə malikdir. Bundan başqa rəhbərlik etdiyi komandaların aşağı yaş qruplarının yaradılmasının tərəfdarıdır. Hələ “Xəzər Adaları”nda çalışdığı dönəmdə klubun aşağı yaş qruplarının yaradılması məsələsini rəhbərlik səviyyəsində qaldırmış və razılıq almışdı. Lakin sonrakı proseslər Elnurun hədəflərini reallaşdırmağa imkan vermədi. Elnur bir vaxtlar birgə top qovduğu və klubda çalışdığı Ağatahir Əzimovla birgə əl-ələ verib həm əsas həm də U19 millisinin inkişafına yardım edəcək potensiala malikdir. Onu digərlərindən müsbət mənada fərqləndirən daha bir cəhəti azərkeşlər arasında sevilməsidir. Qısa məşqçilik dönəmində azərkeş qrupları ilə şəxsən əlaqə saxlayan onların istək və iradlarını dinləyən alan Qəmbərovun təyinatı həm də əcnəbiləşən və yadlaşan yığmanın azarkeşlər arasında yenidən doğmalaşmasına vəsilə ola bilər.

Futzal başbilənlərinin laqeydsizliyi ucbatından incik halda vətəni tərk edib Kanadaya yollanan Elnur Qəmbərovun millidən gələn təklifi müsbət qarşılayıb vətənə dönəcəyinə inanıram. Etimad göstəriləcəyi halda bu etimadı doğruldacağına isə daha çox inanıram. Təki siz Qəmbərovu qaytarın.

ORXAN HÜSEYNOV