Artıq ardıcıl neçənci mövsümdür ki, futzal üzrə Azərbaycan Yüksək Liqasında cəmi 7 komanda mübarizə aparır və 2015-ci ildən bəri “Araz” çempion olur. 

Son mövsüm Naxçıvan təmsilçisi heyətində yer alan braziliyalılarla yollarını ayırdıqdan sonra nəhayət ki, 4 mövsüm bundan əvvəl “Xəzər Adaları”ının uğurunu digər klubların da təkrarlayacağına ümid yaranmışdı. Amma zaman göstərdi ki, nə “Neftçi” İK, nə də EKOL hələ ki, “Araz”la rəqabətə hazır deyil. Ancaq növbəti mövsümdən etibarən Yüksək Liqada bu komanda ilə çempionluq uğrunda mübarizə aparacaq klub çıxış edəcək.

Sportfm.az saytının əldə etdiyi məlumata görə, iki mövsüm əvvəl futzal Yüksək Liqasında gümüş medalları və ölkə kubokunu qazanan “Marafon” yenidən futzal elitasına qayıdır. "Ağ-göylər" yenidən iddialı komanda ilə Yüksək Liqanı bəzəyəcəklər. Elşad Quliyevin rəhbərlik edəcəyi "Marafon” futzal klubu son mövsümündə olduğu kimi güclü heyətlə çempionatda çıxış edəcək və əsas məqsədi finiş xəttini birinci bitirmək olacaq.