Uzun illərdi Azərbaycanda mini-futbolun inkişafına böyük töhfə verən “Ulduzlar Liqası” bu dəfə yeni layihə ilə futbolsevərləri sevindirib.

Belə ki, ilk dəfə olaraq “Ulduzlar Liqası”nın təşkilat komitəsi və “Reburn” şirkətinin birgə layihəsi olan, Sportfm.az saytının informasiya dəstəyi verəcəyi 44 günlük Haqq Savaşında şəhid olmuş Rüfət Eyvazlının adını daşıyacaq “Mini Ulduzlar Liqası”nın püşkatma mərasimi baş tutub.

“Reburn” İdman Komkleksində baş tutan tədbirdə turnirdə çıxış edəcək 16 komandanın nümayəndələri ilə bərabər, veteran futbolçumuz Tərlan Əhmədov başda olmaqla ölkə futbol ictimaiyyətinin tanınmış simaları da iştirak edib.

Püşkatmada ilk söz alan Təşkilat Komitəsinin rəhbəri Anar Məmmədov “Mini Ulduzlar Liqası” haqqında hər kəsə ətraflı məlumat verərək, belə bir layihənin həyata keçməsinə dəstək verən “Reburn” şirkətinə təşəkkürünü bildirib. Oyunların keçiriləcəyi mini-futbol meydançalarının süni örtüyünün yeni dəyişdirildiyini və matçların yüksək səviyyədə keçirilməsi üçün “Reburn” İdman Kompleksində hər bir şəraitin olduğunu vurğulayan Anar Məmmədov əməkdaşlıq üçün 3 illik müqavilə bağlandığını qeyd edib.

“Mini Ulduzlar Liqası”nın rəsmisi daha sonra klub nümayəndələrini bir-bir dəvət edərək püşkatmaya start verib.

İki qrupda – “Reburn” və “Qalaktikos”un hər birində 8 komanda mübarizə aparacaq.

Püşkatma sonrası qruplarda yarışacaq komandaların adlarına aydınlıq gəlib.

Qeyd edək ki, Azərbaycanda 8*8-lik formatı ilə ad çıxarmış “Ulduzlar Liqası” bu dəfə adı ilə yanaşı, formatını da dəyişib. Turnirdə komandaların start heyətində 5 oyunçu yer alacaq.