Gəncə şəhərində voleybol üzrə  bədən tərbiyəsi müəllimlərinin  seminarı təşkil edilib. 

Sportfm.az xəbər verir ki, Azərbaycan Voleybol Federasiyası, Voleybol İnkişaf mərkəzi CEV və  FİVB-nin birgə təşkil etdiyi seminar  FİVB məşqçi instruktoru Papa Georgeous tərəfindən aparılıb.

Seminar iştirakçıları üçün voleybolun tədris olunması haqqında danışılıb, video materiallara baxılıb. Sonra Gəncə şəhər Mircəlal Paşayev adına  39 nömrəli orta məktəbin idman zalında seminarın praktik hissəsi nümayiş etdirilib. 

Papa Georgeous seminar iştirakçılarının voleybol biliklərindən razılıq edərək, hər kəsə uğurlar arzulayıb. 

Qeyd edək ki, 2017-ci ildə ilk dəfə olaraq  voleybol üzrə Avropa Çempionatı Azərbaycanda keçiriləcək. Turnirin D qrupunun oyunları Göygöldə baş tutacaq. Bu məqsədlə Azərbaycan Voleybol Federasiyasının nümayəndələri Elnur Məmmədov və Əbülfəz Hüseynov Göygöl şəhərinə yollanıb. Gəncə və Göygöl şəhərlərinin rəhbərlikləri ilə keçirilən görüşdə Avropa Çempionatının keçiriləcəyi Olimpiya Kompleksində lazımı işlərin aparılması üçün müvafiq plan hazırlanıb.