“Premyer Liqaya uğurlu start götürsək də, sonradan uzun müddət qələbə qazana bilmədik”.

Bunu apasport-a açıqlamasında “Sumqayıt”ın müdafiəçisi Höccət Haqverdi Azərbaycan Premyer Liqasının IX turunda “Səbail”lə keçirilən oyun barədə danışarkən deyib.

“Kapital Bank Arena”da rəqibini 2:0 hesabı ilə məğlub edən “gənclik şəhəri” təmsilçisi 6 oyunluq qələbəsizlik seriyasına son qoyub. 28 yaşlı müdafiəçi bunu “qara zolaq” hesab etmir: “Əvvəlki oyunlarda yaxşı çıxış etsək də, istədiyimiz nəticəni qazana bilməmişdik. Amma “Səbail”lə qarşılaşmada yaxşı oynamaqla yanaşı, qələbə də qazandıq. Nəticədə turnir cədvəlində rəqibi üstələyə bildik. Çox yaxşı komandamız var. “Qara zolaq” deyəndə bunu belə adlandırmazdım. Həqiqətən də, bu dövrdə yaxşı keçirdiyimiz oyunlar oldu, təəssüf ki, qələbə qazanmaq mümkün olmurdu. Şükürlər olsun, bu dəfə 3 xala sevindik. Növbəti oyunlara hazırlaşmalıyıq”.

Milli komandamızın üzvü matçın 63-cü dəqiqəsində rəqibin futbolçusu Nikolas Raysellə yaşadığı münaqişəyə də aydınlıq gətirib: “Topsuz mübarizə zamanı rəqib oyunçu məni vurdu və özünü yerə atdı. Bu məsələni şişirmək istəməzdim. Futbolun içində olan hadisədir”.

Qeyd edək ki, “Sumqayıt” Premyer Liqada növbəti oyununu noyabrın 7-də öz meydanında “Qarabağ”a qarşı keçirəcək.

Oxşar xəbərlər

"Səhv etmək olmaz" - "Qarabağ"ın oyunçusu

“Sumqayıt”la oyunumuz çətin keçəcək” - Abbas Hüseynov

Evdə “Qarabağ”, səfərdə “Neftçi” - Azərbaycan Premyer Liqası

31-ci dueldən kim qalib ayrılacaq?

“Neftçi”nin 52 ay gözlədiyi nə idi?