"Qəbələ”nin ev oyunlarındakı quru seriyası qırılıb. Apasport.az saytının məlumatına görə, Topaz Premyer Liqasının cari mövsümündə ilk dəfə evdə qol buraxan "qırmızı-qaralar”ın seriyası ümumilikdə 6 matç davam edib.  

Ötən mövsümün AZAL (2:0), cari çempionatın "Kəpəz” (2:0), "İnter” (0:0), AZAL (3:0), "Sumqayıt” (2:0), "Qarabağ”la (2:0) qarşılaşmalarında qapısını toxunulmaz saxlayan əyalət klubunun müdafiə səddini "Neftçi” yarıb. X turun qarşılaşmasında 1:4 hesabı ilə uduzan bakılıların kapitanı Araz Abdullayev 49-cu dəqiqədə meydan sahiblərinin seriyasını qırıb.   Maraqlıdı ki, "Qəbələ”nin Premyer Liqada buraxdığı son ev qolunun da müəllifi "Neftçi”nin üzvü olub. Mayın 1-də baş tutan və 2:2 hesabı ilə nəticələnən matçın 64-cü dəqiqəsində Elşən Abdullayev fərqlənmişdi.   191 gündən sonra evdə qol buraxan "Qəbələ”nin quru dəqiqələri 615 dəqiqə sürüb.  

Qeyd edək ki, evdə ardıcıl 6 çempionat matçı qol buraxmamaq "qırmızı-qaralar”ın rekordudu. Bunadək əyalət təmsilçisi ən yaxşı halda ardıcıl 5 matçda qol buraxmayıb. İki dəfə təsadüf olunan bu nəticə 2010-cu və 2015-ci payızında qeydə alınıb.