Yanvarın 26-da Respublika Olimpiya Mərkəzində atletika üzrə 36-cı qış çempionatına start verilib.

Sportfm.az xəbər verir ki, çempionatda atletlər 60, 200, 400, 800, 1500 və 3000 metr məsafələrə qaçış, maneələrlə 60 və 200 metr məsafələrlə estafet qaçışı, uzunluğa, hündürlüyə tullanma, üçtəkanla tullanma, eləcə də nüvəitələmə yarışlarında qüvvələrini sınayırlar.

Yarışın açılış mərasimində çıxış edən Milli Olimpiya Komitəsinin vitse-prezidenti, Azərbaycan Atletika Federasiyasının prezidenti Çingiz Hüseynzadə ölkəmizdə yüngül atletikanın inkişafında belə turnirlərin əhəmiyyətini diqqətə çatdırıb. Azərbaycanda atletikanın inkişafına göstərilən yüksək diqqət və qayğıdan danışan Ç.Hüseynzadə idmançılara uğurlar arzulayıb.

Bildirib ki, cari ildə atletimiz Rahib Məmmədov Latviyada beynəlxalq turnirdə 60 metr məsafəyə maneələrlə qaçış yarışında qızıl medala sahib olub. Zəkiyyə Həsənova isə Qazaxıstanda 60 metr məsafəyə qaçış yarışında gümüş medal qazanaraq Azərbaycan rekordunu yeniləyib.

Ümumilikdə 110 idmançının qatıldığı çempionat iki gün davam edəcək. Yarışların qalibləri İstanbulda keçiriləcək qapalı məkanlarda Avropa kubokunda və Belarusda beynəlxalq turnirdə iştirak hüququ qazanacaqlar.