Azərbaycan Futbol Federasiyaları Assosiasiyası (AFFA) ilə “Liv Bona Dea Hospital” arasında əldə olunmuş razılaşmaya əsasən, “Liv Bona Dea Hospital” Qadınlar Super Liqasının titul sponsoru olacaq.

Sportfm.az xəbər verir ki, 2026/2027-ci və 2027/2028-ci illər mövsümlərində çempionat “Liv Bona Dea Qadınlar Super Liqası” adı altında keçiriləcək.

Bu gün start götürən Azərbaycan Qadınlar Super Liqasının yeni mövsümündə yarışın adının və formatının dəyişdirilməsi ilə yanaşı, iştirakçı komandaların sayı da artırılaraq 12-yə çatdırılıb.

“Liv Bona Dea Hospital” Azərbaycanda fəaliyyət göstərən aparıcı özəl tibb müəssisələrindən biridir. Beynəlxalq səhiyyə sahəsində geniş təcrübəyə malik MLP Care qrupunun tərkibində fəaliyyət göstərən xəstəxana müasir tibbi texnologiyaları, peşəkar mütəxəssis heyəti və geniş xidmət spektri ilə seçilir.

MLP Care-in idman sağlamlığı sahəsindəki təcrübəsinə əsaslanan “Liv Bona Dea Hospital” idmançı sağlamlığına yönəlmiş xidmətlərin inkişafına töhfə verməyi və bu istiqamətdə davamlı əməkdaşlıqlar qurmağı hədəfləyir.

“Liv Bona Dea Hospital”ın Qadınlar Super Liqasının titul sponsoru olması Azərbaycanda qadın futbolunun inkişafına və populyarlaşdırılmasına, çempionatın daha geniş auditoriyaya çatdırılmasına, gənc qızların idmana təşviq edilməsinə, eləcə də qadın futboluna ictimai marağın və kommersiya tərəfdaşlıqlarının artırılmasına töhfə verəcək.

Bu əməkdaşlıq “Liv Bona Dea Hospital”ın Azərbaycan futbolunun, xüsusilə də qadın futbolunun uzunmüddətli inkişafına dəstəyinin mühüm göstəricisidir.

Oxşar xəbərlər

AFFA-dan yeni əməkdaşlıq müqaviləsi

“Misli” Premyer Liqaya sponsorluğunu davam etdirəcək

“Dalğa Arena”nın adı dəyişdirildi

“Qarabağ”dan yeni sponsorluq müqaviləsi

“Neftçi”də yeni sponsor - “Liv Bona Dea Hospital”