Şəkildə gördüyünüz şəxs Azərbaycan futbolunda özünəməxsus çəkisi, izi olmuş futbolçularımızdandır. Azərbaycan futbolunu yaxından izləyən şəxslər, xüsusilə yaşı 30 və onun üzərində olan futbol azarkeşləri onu xatırlamamış olmaz. Vüqar İsmayılovdan söhbət gedir.1992-93-cü illərdə ardıcıl iki dəfə gümüş medalları qazanan Sumqayıt "Xəzər"nin aparıcı futbolçularından olub. "Neftçi" heyətində ölkə kubokunu qazanıb, Kuboklar Kubokunda "APOEL"ə qarşı oynayıb Azərbaycanın klub futbolu tarixində avrokuboklarda ilk xal qazanan heyətdə yer alıb. Eyni zamanda "Şəmkir", "Viləş" kimi klublarda oynayıb, gümüş, bürünc medalları qazanıb, müstəqil Azərbaycanın milli futbol komandasına dəvət alan ilk futbolçulardan olub, Gürcüstana qarşı tarixi oyunda iştirak edib. Futbol mütəxəssisləri hər zaman onun haqqında danışanda deyirdi ki, çox böyük potensialı var idi və rejimə əməl etsəydi, futbolda çox daha böyük uğurlara imza atardı. Həmin Vüqarın hazırda dəstəyə ehtiyacı var. Əslində ailəsi bu məsələnin ictimiləşməsini istəmirdi. Dəstəyə ehtiyacları olsa da, utanırlar ki, kimlərsə başqa cür başa düşər. Oğlu Kamran hazırda "Sumqayıt" Futol Akademiyasında məşqçi işləyir. Uşağı ora məşqə aparanda tez-tez hal-əhval tuturduq, hər dəfə də Vüqarı xəbər alırdım. Bilirdim ki, Türkiyədədi, orda çalışır. Bu gün Kamranla növbəti dəfə hal-əhval tutanda Vüqarın vəziyyətinin yaxşı olmadığını öyrəndim. Qara ciyərində problem yaranıb və 1 həftədir xəstəxanaya yerləşdirilib. Lakin xəstəxana xərcləri çox yüksək olduğundan əlində olan vəsaitin demək olar ki, hamısını xərcləyib. Azərbaycana qayıdıb müalicəsini burada davam etdirməsi çox vacibdir. Lakin xəstəxanaya borcu olduğu üçün oradan çıxmasında problem yaranıb. Səhv etmirəmsə, pasportu və digər sənədləri də xəstəxanadadır və borcu ödənməsə sənədlərin verilməsində, Vüqarın xəstəxanadan çıxışında problem yaranacaq. Borcun məbləği də elə böyük deyil, hardasa 5 min manat civarında borc yığılıb. Vüqarı bu vəziyyətdə görmək şəxsən mənə də çox pis təsir etdi, çünki biz uşaq vaxtı futbola gedəndə böyük simpatiya bəslədiyimiz, özümüzü bənzətmək istədiyimiz futbolçulardan biri də məhz Vüqar idi. Yenə deyirəm, ailəsi qürurlu davranır, utanır, mətbuata çıxmaq, durumun ictimailəşdirilməsini istəmir, amma mən oğlu Kamranla söhbətdən sonra bu haqda yazmağa qərar verdim. Çünki Vüqarın dəstəyə böyük ehtiyacı var və Vüqar Azərbaycan futbolu üçün sıradan futbolçulardan olmayıb. Öz adımdan Vüqarı tanıyan futbol ictimaiyyətinin imkanlı şəxslərinə, klublara, AFFA-ya, vaxtı ilə Vüqarla bir yerdə futbol oynamış imkanlı veteran futbolçulara müraciət edirəm, Vüqara dəstəyinizi əsirgəməyin. Çünki qara ciyər xəstəlikləri təcili və təxirəsalınmaz müalicə tələb edir. Ümid edirəm ki, bu dəstək olacaq. Digər dostlar, yoldaşlar, jurnalist həmkarlar imkanı olan hər kəs bu məlumatı paylaşsa, ictimailəşdirsə çox gözəl olar, bəribaşdan da hər kəsə öz adımdan təşəkkür edirəm. Dəstək, kömək olmaq istəyən şəxslər üçün isə Vüqarın oğlu Kamranın əlaqə nömrəsini də bura yazıram: 077 309 10 34