- Deyəsən, Ağstafa rayonunda futbol sahəsində yaman sakitlikdir!

- Hazırda bizim rayonda futbol adına demək olar ki, heçnə yoxdur. Belə böyük rayonda bir həvəskar komanda belə yoxdursa, hansı futboldan danışmaq olar?

- Ümumiyyətlə komanda yaradılması üçün təşəbbüs irəli sürən olub? 

- Bunu rayon rəhbərliyi, idman idarəsi edə bilər. Onlar isə demək olar ki, bu işlə maraqlanmır. Qalmışıq futbolsuz. 

- Bölgədə futbolla məşğul olan uşaqlar hara gedirlər, hansı yolla bu oyunun sirlərini öyrənirlər?

- Uşaq Gənclər İdman məktəbinin nəzdində fəaliyyət göstərən futbol bölməsində xeyli sayda uşaq məşq edir. Onların içərisində istedadlı yeniyetmələr var. Ancaq təəssüflər olsun ki, bir müddət məşq etdikdən sonra imkanı olan uşağını buradan aparır. Çünki burada perspektiv görmürlər. Məşqlərdə adi top tapmaq belə müşkül məsələyə çevrilib. Mən əlimdən gələn köməyi etsəmdə, bu yetərli deyil. İnvertar çatışmır, normal məşq meydançamız yoxdur. Vaxtilə burada yetişən uşaqların bəziləri hazırda Premyer Liqa klublarının uşaq komandalarında, əsasəndə "Qəbələ”də çıxış edir. Hazırda Ağstafa futbolunun yetirmələri Fərid Nəbiyev "Qəbələ”də əsas heyətə cəlb edilir(A.Ə-19 yaşlılardan ibarət yığmamızın üzvü). Daha bir ağstafalı Emin Zamanov Şahin Diniyev tərəfindən "Kəpəz”in təlim-məşq toplanışında iştirak edir. Yusif Nəbiyev isə "Sumqayıt”ın aparıcı üzvlərindən biridir. 

- AFFA invertarla bağlı kömək etmir?

- Arxada qalan 2016-cı ildə heç nə verilməyib. Bu il isə deyə bilmərəm nə isə olacaq, yoxsa yox. 

- Çıxış yolunu nədə görürsünüz?

- Bölgələrdə komandalar olmasa futbolun inkişafından danışmaq olmaz. Ən azından futbolçu yetişdirmək istəyiriksə, heç olmasa həvəskarlar liqasında mübarizə aparan bir klubumuz olmalıdı. Yoxsa 12 yaşına qədər məşq et, sonra komanda olmadığına görə futbolu at. Belə olmaz axı..O vaxtlar "Avey” vardı, özünü yaxşı tərəfdən göstərən gəncləri ora cəlb edirdilər. Həmin klub mütləq bərpa olunmalıdır.