İcarə əsasında Niderlandın “Telstar” komandasında çıxış edən, müqavilə ilə “Sabah” klubuna məxsus olan Ozan Can Kökçü müsahibə verib.

Sportfm.az həmin müsahibəni təqdim edir:

Ozan, Niderlandda vəziyyət necədir, yeni komandana uyğunlaşa bilmisən?

Vəziyyət yaxşıdır, komandada ciddi itkilərimiz olsa da, mübarizə aparmaq üçün gücümüz var. Əlbəttə, uyğunlaşmışam və komanda yoldaşlarımın çoxu keçmiş komanda yoldaşlarım və ya tanıdıqlarımdır. Şükürlər olsun, hər şey yolundadır.

Elə futbola da məhz Niderlandda başlamısan, karyeranın böyük bir hissəsi bu ölkə ilə bağlıdır. Keçmişdən bu günə Niderland futbolunda hansı dəyişiklikləri hiss edirsən?

Bu ölkədə futbol və həyat səviyyəsi fərqlidir. Düşünürəm ki, artıq arada olan fərqi bağlaya bilmişəm. Burda keçirəcəyim vaxtın mənə fayda verəcəyini hiss edirəm.

Artıq “Telstar”da 6 oyuna çıxsan da, fərqlənməyi bacarmamısan.

Bəli, fərqlənə bilərdim, şanslarım da var idi. Lakin bu çempionat düşünüldüyü qədər asan deyil.

Baş məşqçinizin səninlə bağlı fikirləri necədir?

Baş məşqçimizin mənə olan inamı tamdır. Qarşıda 12 oyunumuz var, yaxşı olacağına inanırıq.

Turnir cədvəlində 9-cusuz. Niderlandın yüksək liqasına – Erediviziyaya vəsiqə qazanmaq şanslarınız necədir?

Bəli, bayaq da dediyim kimi, zədəlilərimiz var. Futbolda hər an qəribə şeylər yaşana bilər. Qarşıda oyunlarımız var, hər şey ola bilər.

Ozan, Azərbaycan Premyer Liqasını izləyirsən?

Təbii ki, hər zaman komandamın – “Sabah”ın oyunlarını izləyirəm.

“Sabah”ın bu mövsümkü çıxışını necə qiymətləndirirsən? Komanda turnir cədvəlinin sonuncu pilləsində yer alıb.

Bu, futboldur, hər şey mümkündür. “Sabah”ın futbolçuları pis oynamır, lakin bir az bəxtə ehtiyacları var. Komanda yoldaşlarıma inanıram, inşallah, mövsümün sonunda daha yaxşı yerdə olacaqlar.

Bakı və burdakı komanda yoldaşların üçün darıxırsan?

Bakının yeri qəlbimdə ayrıdır, evimi sevirəm. Bakı və komanda yoldaşlarım üçün darıxıram.

“Sabah” və Azərbaycan milli komandasının nümayəndələrindən səninlə maraqlanan olur?

Əlbəttə, onlarla danışıram.

Mövsümün sonunda geri qayıtmağı düşünürsən, yoxsa ölkə xaricində başqa bir kluba getmək istəyirsən?

Mən “Sabah” klubunun futbolçusuyam və bura – Niderlanda futbolumu inkişaf etdirmək üçün gəlmişəm. Digər məsələlər menecerim və klubumun işidir. Mənim işim futbol oynamaqdır. (komanda.az)