Son mövsümdə maliyyə sıxıntısı yaşayan "Xəzər Lənkəran” komandasının heyətində bir çox gənc futbolçu forma geyinmək şansı qazandı. 17 yaşlılardan ibarət yığma komandamızın aparıcı üzvü İbrahim Qədirzadə həmin gənclərdən biri idi. Azərbaycan Premyer liqasının tapıntılarından sayılan İbrahim mövcudluğuna son qoyulan doğma Lənkəran təmsilçisini tərk edərək paytaxta yollanıb. Gənc futbolçu "İnter”in əvəzedici heyəti ilə müqavilə bağlayıb. "Ağ-göylər”in futbolçusu kimi ilk müsahibəsini Sportfm.az saytına verən Qədirzadə bir çox məqamlara aydınlıq gətirib.  

- İbrahim "Xəzər Lənkəran”da əsas heyətin aparıcı simalarından biri idin, "İnter”də isə əvəzedici heyətdə çıxış edəcəksən.  

- Bəli, ancaq mən bunu geriyə addım kimi dəyərləndirmirəm. Düşünürəm ki, verdiyim qərar doğrudur, çünki daim oynamaq lazımdır. Təbii ki, istəyirdim ki, Premyer liqada oynayım.  

- Hər halda "İnter”in əvəzedici heyətində çox qalmaq fikrin yoxdur.

- Burada daim oynayaraq əsas komandaya düşmək istəyirəm. Bilirəm ki, çətin olacaq. Öz üzərimdə çalışaraq rəqabətə hazır olmalıyam. Gələcəkdə əsas komandanın daimi üzvlərindən birinə çevrilmək istəyirəm. Bunun üçün əvəzedici heyətdə özümü yaxşı tərəfdən göstərməliyəm.  

- Sən həm də aşağı yaş qrupları üzrə yığma komandalarımızda çıxış edirsən.  

- Bildiyiniz kimi, 17 yaşlılardan ibarət yığma komandamızda oynayırdım. Artıq bu yaş qrupunda çıxışımı başa vurdum. Daha yuxarı yaş qruplarına dəvət olunmaq üçün var gücümlə çalışacam. Hər bir futbolçunun ən böyük arzusu millinin şərəfini qorumaq olmalıdır.  

- Gələcəkdə futbol həyatını ölkə xaricində davam etdirmək fikrin varmı?

- Hər bir gənc futbolçu kimi məndə gələcəkdə karyeramı xaricdə davam etdirmək istəyərdim. "Xəzər Lənkəran”da oynayanda da bu belə idi, "İnter”də də belə olacaq. Bilirəm ki, bunun üçün yüksək səviyyədə çıxış etmək lazımdır. İngiltərə Premyer liqasında qüvvəmi sınamaq maraqlı olardı. Hansı klubun olmasının fərqi yoxdur. Ancaq etiraf edim ki, özüm "Mançester Yunayted”in azarkeşiyəm.  

- İbrahim "Xəzər Lənkəran” yenidən Premyer liqamıza qayıdarsa-geri dönərsən?

- "Xəzər Lənkəran” mənim doğma klubumdur. Ora mənim evimdir. Komandam bərpa olunarsa, təbii ki, geri dönərəm.