Fransada Avropa çempionatının start götürməsinə iki gün vaxt qalıb. Artiq turnirin favoritləridə məlumdur. Onların sırasında ən çox adı çəkilən yiğmalardan biri İspaniyadır. Düzdür, hazırki komanda Xavili, Puyollu, Vilyalı, İnyestalı(Andres hələdə millidədir) əzəmətli İspaniya deyil, ancaq Visente Del Boskenin Fransaya apardığı futbolçulara nəzər saldıqda, onların daha bir Avropa çempionatını qazanmağa qadir olduğunu deyə bilərik. Və bu İspaniya Parisə yollanmazdan öncə qonşumuz Gürcüstanı özünə rəqib seçərək ( yoxlama oyunu keçirmək təklifi İspaniya Futbol Federasiyasından gəlib), Xetafe şəhərində baş tutan oyunda 0-1 hesabı ilə məğlub olub! Deyəcəksiniz bundan bizə nə? Yəqin ki, bizim İspaniyanı Bakıya pul zoruna gətirib yoldaşlıq görüşü keçirdiyimiz hər kəsin yaxşı yadındadır. İspanların bir ayaqla qapımızdan keçirdiyi 6 topuda kimsə unutmuş deyil. 2009-cu ildə, məhz iyun ayında Bakıda keçirilən matçda yığmamız meydanın mərkəzini belə güclüklə keçirdi, qapıya zərbədən, təhlükəli epizoddan isə danışmağa dəyməzdi. Onda ölkə çempionatında rəqabət vardı, gələcəyə ümidlə baxırdıq, futbolumuzun inkişafına dair dövlət proqramı qüvvədə idi.  Pireney yarımadasından gələn qonaqlar, yığmamızın daşını daş üstə qoymayaraq bizləri göylərdən yerə endirdi. Lakin, hər şeyə dözdüyümüz kimi, belə acı məğlubiyyətədə dözərək, "gələcəkdə yaxşı olar”,- deyə düşünmüşdük! Və budur oldu. Beş il yol gəldiyimiz qaranlıq tunelin sonunda bəlli oldu ki, alman getdi, yerinə xorvat gəldi, hazırda harada olduğu, Azərbaycan pasportunun başına nə oyun açdığı məlum olmayan Daniel Axtyamovun əvəzinə, dollar şəkli paylaşan Ruslan Qurbanov var. Azərbaycan Premyer liqası 8 komandanın ümidinə qaldı, ağır tonajlı gəmi "Xəzər Lənkəran” futbol dənizimizdə batdı. "Neftçi” 6-cı sıradan avrokuboklara vəsiqə qazandı, "Bakı”nın sadəcə adıdır, dövlət proqramının vaxtı bitdi və hər yerdə futbol inkişaf etməsinə baxmayaraq, bizim əks marşrutla getdiyimiz aydın oldu. Hərdən boylanıb, pulun olmadığı, xaricdə 400-ə yaxın futbolçusunun oynadığı, futbolla bağlı proqramın 5 ay bundan öncə qəbul edildiyi qonşu Gürcüstana baxmaq əvəzinə, bizdən Andorra ilə bərabərə qalmağımıza uğur kimi baxmağımızı istəyənlər, sabah San-Marinoya məğlub olduqda, bunu qələbə kimi qələmə verməyimizi tələb edəcəklər. Bəli, məhz tələb edəcəklər. Gürcüstanın İspaniyanı məğlub etməsini görməzdən gələrək, iki məhəllədən ibarət olan Andorra ilə görüşün hazırlıq xarakteri daşıdığını bildirdikləri kimi. 

İmza: Araz Əhmədov