Mayın 2-də AFFA yanında Media Komitəsinin İdarə Heyətinin tam tərkibdə növbəti iclası keçirilib.

Sportfm.az xəbər verir ki, AFFA-nın konfrans zalında baş tutan iclasda əvvəlcə cari məsələlər müzakirə olunub. Daha sonra «Bölgə futbolu: resurslar, imkanlar və reallıqlar» istiqamətində qaliblərdən biri olan sportmedia.az saytının müraciətinə baxılıb. Bundan başqa layihələrin aprel ayında icrası ilə bağlı mentorların hesabatları dinlənilib, bəzi KİV-nin işində çatışmazlıqlar olduğu müəyyən olunub. Layihələrin gec açıqlanması və aprel ayında icrası üçün vaxtın məhdud olması nəzərə alınaraq çatışmazlıqların may və iyun aylarında aradan qaldırılması üçün həmin KİV-ə vaxt verilib. Layihə qalibi olmuş qəzet və saytlardan ödəniş edilməsi üçün vacib olan hesab-fakturaları mayın 6-a kimi AFFA-ya, «Futbol+» qəzetinin redaksiyasına və ya MK-nın İdarə Heyətinin üzvü İlqar Tağıyevə təqdim etmələri tələb olunur.