Qazaxıstan yığmasının əslən azərbaycanlı ağırlıqqaldıranı Nicat Rəhimov və Beynəlxalq Ağırlıqqaldırma Federasiyası (IWF) bir-birinə qarşı iddia qaldırıb.

Sportfm.az xəbər verir ki, məsələyə sentyabrın 22-də İdman Arbitraj Məhkəməsində (CAS) baxılacaq.

29 yaşlı idmançı dopinq-test üçün verdiyi sidik analizini dəyişdirməkdə şübhəli bilinib. Beynəlxalq Test Agentliyi (ITA) 2021-ci ilin yanvarında Rəhimova qarşı antidopinq qaydalarının pozuntusu ittihamını irəli sürüb.

CAS isə bu il martın 22-də onu 8 il müddətinə bütün yarışlardan kənarlaşdırıb. Ağırlıqqaldıranın 15 mart 2016-cı ildən 18 yanvar 2021-ci ilədək göstərdiyi bütün nəticələr ləğv olunub. Beləliklə, Rəhimov 2016-cı il Rio-de-Janeyro Yay Olimpiya Oyunlarında 77 kq çəki dərəcəsində qazandığı qızıl medaldan məhrum edilib. Uzunmüddətli cəza ötən ilin 18 yanvarından hesablanmağa başlayıb.

Qərardan narazı qalan ağırlıqqaldıran IWF-ni cəzanın təşəbbüskarı sayaraq, CAS-a şikayət edib. Öz növbəsində, ITA-nın qərarını alqışlayan IWF onu məhkəməyə verib.

Rəhimov 2014-cü ildə Azərbaycan yığmasını tərk edərək, Qazaxıstan vətəndaşlığına keçib. O, növbəti il dünya, 2016-cı ildə isə olimpiya çempionu olub. Rəhimov Azərbaycan millisində ikən 2013-cü ildə orqanizmində steroidlər tapıldığı üçün 2 il müddətinə diskvalifikasiyaya məruz qalıb.

Oxşar xəbərlər

Azərbaycanlı olimpiya çempionunun qızıl medalı əlindən alındı - 8 il diskvalifikasiya

Azərbaycanlı idmançının olimpiya medalı əlindən alındı - Ağır cəza

Azərbaycanlı olimpiya çempionu dəstək istədi - "Ağırlıqqaldırma mənim həyatımla bağlıdır"

"Məni ittiham edirlər" - Azərbaycanlı olimpiya çempionu

Azərbaycanlı olimpiya çempionu yarışlardan kənarlaşdırıldı - Dopinqə görə