"Qarabağ" bu gün Tiranada "Partizani" ilə oyuna itkilərlə çıxacaq.

Sportfm.az xəbər verir ki, matçın başlamasına bir neçə saat qalmış komandanın müdafiə xəttində ciddi problemlər yaşanır. Bir neçə gün öncə Çexiya "Viktoriya"sı ilə yoxlama matçında əzələsi dartılan mərkəz müdafiəçisi Bədavi Hüseynovun həm bugünkü, həm də cavab matçını buraxacağı dəqiqləşib. Hüseynov yalnız avrokuboklarla ikinci təsnifat mərhələsinin ilk oyununa hazır ola bilər.

Amma komandanın müdafiə xəttində problemlər bununla yekunlaşmır. Adı bu matç üçün sifariş olunan sol cinah müdafiəçisi Donald Gerye hələ də "Qarabağ"ın düşərgəsinə qoşulmayıb. Bu səbəbdən Ağdam klubu onun da xidmətindən istifadə edə bilməyəcək. 

Sol cinah müdafiəçisi Ailton Silva isə cəzalı olduğuna görə "Partizani" ilə ilk matçda meydana çıxa bilməyəcək. Bundan başqa, bir neçə gün öncə dizindən zədələnən kapitan Rəşad Sadıqovun ayağında ağrılar davam edir. Amma o, bugünkü görüşdə komandasına kömək edə biləcək.

Beləliklə, bu gün "Qarabağ"ın müdafiə xəttində sol cinahda Abbas Hüseynov, ortada Rəşad Sadıqov və Rahil Məmmədov, sağda isə Maksim Medvedyevin çıxış edəcəyi gözlənilir.

Xatırladaq ki, Çempionlar Liqasının birinci təsnifat mərhələsinin "Partizani" - "Qarabağ" oyunu bu gün Bakı vaxtı ilə saat 19.30-da başlanacaq.

Oxşar xəbərlər

"Qarabağ" - "Partizani" oyununda ehtimal 11-liklər

"Qarabağ"ın yeni transferi cavab matçında meydana çıxa bilər - Açıqlandı

"Partizani" - "Qarabağ" oyununda ehtimal 11-liklər

"Qarabağ" albanların üzərinə 5 qapıçı ilə gedir

"Qarabağ" Çempionlar Liqasına 4 qapıçı ilə yollanır