DÇ 2018-in seçmə qrup mərhələsi çərçivəsində futbol üzrə millimiz qrupda ikinci oyununu Norveçə qarşı bu gün Bakı Olimpiya Stadionunda keçirəcək. Yığmamızın sabiq baş məşqçisi hazırda "Kəpəz”i çalışdıran Şahin Diniyev matçla bağlı Sportfm.az saytına fikirlərini bildirib.

”Bizi çətin matç gözləyir. Norveç son zamanlar Skandinaviya futbolu deyil, "avropasayağı” oyuna üstünlük verir. Norveçlilər əvvəlki kimi atletik yox, texnikalı, topa nəzarətlə və yaradıcı oyunla uğur qazanmaq istəyir. Şimal ölkələrinin futboluna xas olan cinah ötürmələrini, başla oyunu bu dəfə rəngarəng hücumlarla əvəzləyəcəklər. Təbii ki, çətin olacaq. Yığmamız evdə uğur qazanmaq üçün əlindən gələni edəcək. 3 xal qazandığımız ilk görüşdən sonra(San-Marinonu səfərdə 1-0 yendiyimiz matçı nəzərdə tutur) motivasiya baxımdan problemimiz olmayacaq. İnanıram ki, yığmamız bu görüşdə uğurla çıxış edə bilər”.  

Qeyd edək ki, Azərbaycan-Norveç oyunu saat 20:00-da start götürəcək.