2014-cü ildən bu yana keçirilməyən çimərlik futbolu üzrə ölkə çempionatı bərpa olunub. 

 

Sportfm.az xəbər verir ki, ötən gün start verilən çimərlik futbolu üzrə Superliqanın oyunları Su İdmanı Sarayının meydançalarında keçirilir. Azərbaycan Çimərlik Futbolu Federasiyası tərəfindən düzənlənən turnirdə "Zirə", "Neftçi", "Sumqayıt" və "Səbail" komandaları iştirak edir. Saytımıza daxil olan məlumata görə, federasiya rəhbərliyi qeyri-adi bir qərar qəbul edərək, çimərlik futbolu üzrə FİFA referisi, uzun illərdir Azərbaycanda və ölkə xaricində bir çox yarışların baş hakimi olan Əfqan Həmzəyevə dəvət göndərməyib. Məhz buna görə, Həmzəyev avqustun 5-nə qədər davam edəcək Superliqanın oyunlarından kənarda qalıb. Bunu Hakimlər Komitəsinin sədri Xəqani Məmmədovla Həmzəyevin arasındakı "soyuq" münasibətlə izah etmək olar. Belə görünür ki, Məmmədov Superliqanın oyunlarına hakim təyinatı zamanı FİFA referisinin autda qalmasını istəyib.