Avroliqanın 1-ci təsnifat mərhələsinin ilk oyununda Serbiya təmsilçisi Mladost"u səfərdə böyük hesabla məğlub edən "İnter"in problemləri bitmək bilmir. 

Sportfm.az saytının əldə etdiyi məlumata görə, klubun Müşahidə Şurasının sədri Zaur Axundov futbolçuların Serbiya səfəri öncəsi maaşlarını cibindən ödəyib. Lakin, bununla iş bitmir, belə ki, komandanın və stadionun işçilərinə olan borclar ödənilməyib. Klubun bazasını itirmək təhlükəsi isə artıq daha realdır. Belə ki, klub Beynəlxalq Bankın himayəsi altında olduğu dövrlər, yaranan borc bataqlığından çıxmaq məqsədi ilə bazanı və stadionu girov göstərərək başqa bir bankdan külli miqdarda kredit götürüb. Hazırda həmin krediti qaytara bilməyən Zaur Axundova vaxt verildiyi deyilir. Əgər klub rəhbəri iyunun 7-sinə qədər kredit borcunu verə bilməsə, "İnter" bazadan çıxarılacaq.