"Bəzi şərtlər məni qane etmədi, bəziləri isə "Neftçi"ni. Buna görə də getməyim daha məsləhətli idi".

Sportfm.az saytı xəbər verir ki, bu sözləri Qol.az-a açıqlamasında "Neftçi"nin mətbuat xidmətinin rəhbəri vəzifəsindən ayrılan Mehman Rəsulov deyib.

O, "Neftçi"dən ayrılmağının səbəbini klubun ona lazım olan dəstəyi verməməsi ilə izah edib: "Komandanın hazırda mövqeyi elədir ki, mətbuatdan təzyiq çox olur. İndiki vəziyyətdə və bu şərtlərlə işləmək həqiqətən də çətindir. Bəzi layihələr düşünmüşdüm. Zamanla o layihələr reallaşmadı. Gördüm ki, klubdan dəstək gəlmir. Bu səbəbdən qərara gəldim ki, "Neftçi"ni tərk edim. Belə vəziyyətdə ən yaxşısı bu idi".

Qeyd edək ki, M.Rəsulov 2015-ci ildən "Neftçi"nin mətbuat xidmətinin rəhbəri vəzifəsində çalışırdı.