"Real" La Liqada mövsümün ilk matçını doğma meydanda "Hetafe"yə qarşı keçirdi və 2:0 hesablı qələbə qazanıb. 

Sportfm.az xəbər verir ki, "Santiaqo Bernabeu"da keçirilən oyunda stadionun tam dolmaması diqqətlərdən yayınmayıb. Son illərdə demək olar ki, bütün oyunlarda stadionu dolduran "kral klubu"nun fanatları bu dəfə sevimli komandalarını tək buraxıblar. Madrid derbisini arenadan 48 min 466 nəfər izləyib. Bu isə son 9 ildə "Santiaqo Bernabeu"da qeydə alınan ən az azarkeş sayı olub. 

Sonuncu dəfə belə hal Kriştiano Ronaldonun "Real"a gəlmədiyi dönəmdən - 2009-cu ildən əvvəl baş vermişdi. Həmin il mayın 24-də keçirilmiş "Real" - "Malyorka" qarşılaşmasını 44,270 azarkeş izləmişdi.

Qeyd edək ki, "Santiaqo Bernabeu" 81 min 44 nəfərlik azarkeş tutumuna malikdir.