"Mançester Siti” növbəti transferini reallaşdırıb. Apasport.az saytının xarici mətbuata istinadən məlumatına görə, "şəhərlilər” Leroy Sanedən sonra daha bir oyunçunu heyətinə cəlb edib. Belə ki, İngiltərə təmsilçisi "Palmeyras”ın gənc üzvü Qabriel Xesusla anlaşıb. Yay Olimpiya Oyunlarında iştirak etmək üçün Braziliya yığmasının heyətində yer alan 19 yaşlı hücumçunun keçidi "Mançester Siti”yə 32 milyon avroya başa gəlib. Ancaq anlaşmaya əsasən, Qabriel dekabr ayına qədər "Palmeyras”ın formasını geyinəcək. Ötən mövsüm keçirdiyi 30 oyunda 19 qola imza atan oyunçu ada klubu ilə 5 illik müqavilə imzalayıb.

 

Yeni transfer keçidlə bağlı fikirlərini də bölüşüb. O, "Mançester Siti”ni dünyanın ən güclü klublarından biri olduğu üçün seçdiyini deyib: "Komandada istedadlı oyunçular və Pep Qvardiola kimi çox şey öyrənəcəyim möhtəşəm məşqçi var. Azarkeşlərə bacarığımı göstərmək üçün səbirsizlənirəm”.